காற்றின் மொழி – RJக்களுக்கு ஒரு மரியாதை

images (71)

நம்மைச் சுற்றி நடக்கும் அனைத்து விஷயங்களுமே சரியாக, அதாவது நமக்கு சாதகமாகவே, இருக்கும் என்ற அசட்டு நம்பிக்கையிலேயே வாழ்ந்து மடிந்துவிடத் துடிக்கும் நடுத்தரவர்க்க மனநிலையை காட்சிப்படுத்துவதில் ராதாமோகனுக்கு கிடைத்த மீண்டுமொரு வெற்றி. இம்முறை, அருகிக் கொண்டுவரும் வேலைக்கு செல்ல முடியாத மனைவிகளின் பெருமூச்சுக் காற்றை, “Hello…” என்ற வசீகர மொழியாக்கியிருக்கிறார்.

தினமும் பறவைபோல பறந்து துடித்து வாழவிரும்பும் நடுத்தரவர்க்கத்திற்கு ஒவ்வாத மனநிலையைக் கொண்ட ஜோதிகாவை, +2வைக் கூடத் தாண்டாத அவருடைய கல்வியின்மையை காரணம் காட்டி முடக்கிவைக்கிறது அவருடைய நடுத்தரவர்க்க குடும்பம். அதிலிருந்து, தன் கனவுகளைச் சிறகாய் வளர்த்துப் பறந்து விஜி வந்தடையும் இடம் ஒரு பண்பலை வானொலி நிலையத்தின் RJவாக. அதுவு‌ம் இரவில் கிரங்கடிக்கும் வகையில் வாசகர்களின் அந்தரங்க பிரச்சினைகளைப் பற்றி பேசவேண்டிய ‘மதுவுடன் ஒரு இரவு’ எனும் நிகழ்ச்சியின் RJ மதுவாக.

images (73)

கலையாமல் அடுக்கி வைக்கப்பட்டிருந்த வீட்டினை ஒரு குழந்தை நுழைந்து கலைத்துப் போடுவதை போல தன் ருசியான இரவுணவாலும், கிரங்கடிக்கும் குரலாலும், வாசகர்களின் வில்லங்கமான கேள்விகளுக்கு ஒரு தேர்ந்த உளவியலாளர் அளிக்கும் தீர்வுகளைப் போன்ற முதிர்ச்சி பதில்களாலும், அந்நிறுவனத்தை தலைகீழாக்கி விடுகிறார் விஜி.

150269_thumb_665

தான் ஓட்டும் இரயிலின் முன்பு விழுந்து தற்கொலை செய்து கொள்பவர்களால் உறக்கமின்மையில் தவிக்கும் இரயில் ஓட்டுநரின் கேள்வியாகட்டும்; தான் சந்திக்கும் பெண்களின் கண்களை உற்று நோக்க முடியாமல் அவர்களின் மார்பகங்களையே அளவெடுக்கும், பெண்களுக்கான உள்ளாடை விற்பனைக்கு நிறுவனத்தில் பணிபுரியும் ஒருவரின் கேள்வியாகட்டும்; RJ மதுவாக விஜி தன்னுடைய மாறாத அதே கிரங்கடிக்கும் குரலில் அளிக்கும் பதில்கள் புத்துணர்ச்சி மருந்து. தங்களுடைய சோகங்களை, பிரச்சினைகளை, குறிப்பாக தங்களுடைய தனிமையையும் பகிர்ந்து கொள்ளும் வாசகர்களுக்கான நிகழ்ச்சியாகிப்போகிறது விஜியின் ‘மதுவுடன் ஒரு இரவு’.

201811172137183331_Katrin-Mozhi-in-cinema-review_SECVPF

வழக்கம்போல் நடுத்தர குடும்பங்களுக்கே உரிய பாசச்சேறு விஜியை மீண்டும் உள்ளிழுத்து முடங்க வைக்க முயல்கிறது. விஜி தன் வேலையை விட்டுவிட முடிவு செய்தவுடன், “இன்னும் கொஞ்ச நேரம் இக்குழந்தை என் நிறுவனத்தை கலைத்துப் போடக்கூடாதா”என ஏங்குகிறார் அந்நிறுவனத்தின் தலைவி. விஜி போன்ற பெண்களின் ஆதர்சம் இவர். ‘மதுவுடன் ஒர் இரவு’ நான் நடத்தியிருந்தால், “நிறைய இரவு மிருகங்களுக்கு தீனி போட்டிருப்பேன். ஆனா, நீங்க அந்த மிருகங்களுக்குள் உறைந்திருக்கும் குழந்தையை வெளிய கொண்டு வந்துருக்கீங்க” என்று நெகிழ்கிறார் அந்நிகழ்ச்சியின் ஒருங்கிணைப்பாளர். இப்படி படம் முழுதும் மனதில் பதியும் வசனங்கள், இப்படத்திற்கு மிகப்பெரிய உறுதுணை.

images (72)

“என் வீட்டில் வாஷிங் மெஷின் கூடதான் இல்ல. அதுக்காக அந்த இடத்துல உங்க வாஷிங் மெசின கொண்டு வந்து பார்க் பண்ணுவீங்களா என்ன..” என தன் கார் பார்க்கிங்கை உபயோகித்தவர்களிடம் சிடுசிடுக்கும் எம.எஸ். பாஸ்கர்; “நான் தனியா இருக்கேன். அவன் தனிமையில் இருக்கான்” என ரொமான்ஸ் காட்டும் மனோபாலா; ஒரு துடைப்பக்கட்டையை Home Delivery செய்ய தன் மூட்டுவலியை பொருட்படுத்தாமல் இல்லாத நான்காவது மாடிவரை ஏறியிரங்கும் வழியல் மன்னன் மயில்சாமி என படத்தில் வரும் அனைத்து கதாபாத்திரங்களும் ஏதோ ஒரு வகையில் அருமையாக ஜோதிகா என்னும் மையத்துடன் இணைக்கப்பட்டிருப்பது அருமையான திரைக்கதை உத்தி.

images (74)

சேவைப் பொருளாதாரத்தின் விளைவுகள் இப்படம் முழுதும் நுண்பகடி செய்யப்பட்டாலும், அவை தந்திருக்கும் வாய்ப்புகளையும் சரிசமமாக காட்சிப்படுத்தியிருக்கிறார்கள். இக்கதையை பெண்ணுரிமை அல்லது பெண்ணியம் என்ற புரட்சிக் கருத்தாங்கங்களுடன் கூடுமானவரை ஒன்றவிடாமல் தடுத்து பிரசார நெடியைத் தவிர்த்திருப்பதால், ஜோதிகாவிடம் சிறைபட்டிருந்த அந்த “Hello…” என்ற வார்த்தை சுதந்திரச் சிறகுகளோடு அவருடைய உதடுகளிலிருந்து உருகி வெளியேறி காற்றில் மிதந்து நம்மையும் கிரங்கடிக்கத்தான் செய்கிறது.

images (75)

Advertisements

மன்றம் – ஒரு சீரிய முயற்சி

https_cdn.evbuc.comimages526255052768939118961original

மிகவும் புகழ்பெற்ற தொழில்நுட்ப வல்லுனரான Zohoவைச் சேர்ந்த ராஜேந்திரன் தண்டபாணியின் கன்னித் தமிழுரையை கேட்கவைத்திருக்கிறது ‘மன்றம்’ என்ற அமைப்பு. தமிழில், இதுபோன்ற பல்வேறு துறை வல்லுநர்களை அழைத்து அவர்களுக்கான மேடையை அமைத்துத்தரும் அமைப்புகள் ஏதும் இருக்கிறதா என்று தெரியவில்லை. தமிழர்களை தமிழில் உரையாற்ற வைப்பதே பெரிய சாதனை என்று சொல்லுமளவுக்கு நாம் தாழ்ந்து போயிருந்தாலும், ஒட்டுமொத்த உரையையும் முடிந்த அளவு தமிழிலேயே ஆற்றவைக்கும் இம்முயற்சி மிகவும் போற்றுதலுக்குரியதே. இதுவரை எனக்குத் தெரிந்து இதுபோன்ற மேடைகளில் தொடர்ந்து தமிழில் உரையாற்றி வரும் சிந்தனையாளர் எழுத்தாளர் ஜெயமோகன் மட்டுமே. சமீபத்தில் அவருடைய இலக்கியவட்டம் நடத்திய ஒரு நிகழ்வில் அவருடைய உரையை கட்டணம் செலுத்தி கேட்க வேண்டியிருந்தது. ‘மன்றம்’ போன்றவர்களின் முயற்சிகள் இப்படியொரு இலக்கை நோக்கிப் பயணிக்க வாழ்த்துக்கள்.

தன்னுடைய செயற்கை நுண்ணறிவு (Artificial Intelligence) பற்றிய உரைக்காக,எந்திரனுக்கு, ‘பொறியன்’ என்றொரு தமிழ் வார்த்தையை தேடிக் கண்டுபிடித்திருக்கிறார் ராஜேந்திரன். இப்படி அவர் உரை முழுதும் சுவாரஸ்யங்களுக்கு குறைவில்லை. அதே சமயத்தில் இன்னும் 20 ஆண்டுகளில் பொறியன்கள் தன்னுடைய அடுத்தகட்ட செயற்கை நுண்ணறிவை மனிதர்களின் உதவியின்றி தாங்களே வடிவமைத்துக் கொள்ளும் என்ற பீதியையும் கிளப்பினார்.

ஆரம்ப காலங்களில் மேதைகளிடமி்ருந்து மட்டுமே கற்று தங்களை மேம்படுத்திக்கொண்ட பொறியன்கள், தொழில்நுட்ப வளர்ச்சியின் காரணமாக அனைவரிடமிருந்தும் கற்றுக்கொண்டு மனிதர்களை முந்திச் செல்வது “ஒன்றுபட்டால் உண்டு வாழ்வு” என்பதையே ஞாபகப்படுத்தியது. நாம் இணையத்தில் செலவழிக்கும் ஒவ்வொரு நொடியும் பொறியன்களை நாளொருமேனியும் பொழுதொரு வண்ணமுமாக கடவுள் ஸ்தானத்தை நோக்கி நகர்த்துகின்றன என்று கூறி “மனிதனை உருவாக்கியவனை மனிதன் உருவாக்குகிறான்” என்று முடித்தார் ராஜேந்திரன்.

கிட்டத்தட்ட ஒரு நூறு பேர் அமர்ந்திருந்த அந்த குளிரூட்டப்பட்ட அரங்கத்தில் மதியம் 2மணி முதல் மாலை 6 வரை ஐந்து விதமான தலைப்புகளில் நடந்த உரைகள், அனைவரையும் வெகுவாக ஈர்த்து இருக்கையோடு பிணைத்திருந்தது. பெரும்பாலும் இதுபோன்ற உரைகள் இளையவர்களை கவரும் வகையில் இருக்க வேண்டும் என்பதற்காக அமைப்பை மீறி வெற்றிபெற்றவர்களை அழைப்பது வாடிக்கையாக இருக்கும். “இதுபோன்ற விதிவிலக்குகள் எப்போதும் உதாரணங்களல்ல” என்பதை உணர்ந்து அமைப்புக்குள்ளிருந்து வெற்றி பெற்றவர்களுக்கு தொடர்ந்து உரையாற்றும் வாய்ப்பு அளிக்கப்படும் பட்சத்தில் ‘மன்றத்தில் தென்றல் வீசும்’.

https://www.eventbrite.com/e/mandram–tickets-51371592817?aff=ebdssbdestsearch#

சர்க்கார் – மீண்டுமொரு அரசியல் கனவு

images (67)

அரசியல் மாற்றம் வேண்டி இளைஞர்களை இரத்தம் சிந்த அழைத்திருக்கிறார் சர்கார் விஜய். சில அரைவேக்காட்டு கம்யூனிஸ்டுகள் எந்த காலத்தில் மைக்கைத் தொட்டாலும், “நாம் வரலாறு காணாத நெருக்கடியில் இப்போது இருக்கிறோம்” என்று முழங்குவது தான் நினைவுக்கு வருகிறது. மத்தியில் ஆளும் பா.ஜ.க அரசாங்கத்தின் குறைகளை சுட்டிக்காட்டி மெர்சல் செய்துவந்த விஜய்க்கு மாநிலத்தில் ஆளும், ஆண்ட திராவிடக் கட்சிகளை மெர்சல் செய்யும் வாய்ப்பு சர்க்காரில் கொடுக்கப்பட்டுள்ளது.

IMG_20181111_1959069

“ஒரு 3 மணி நேர சினிமாவுல 60 ஆண்டு கால திராவிட பாரம்பரியத்த ஒன்னும் சிதச்சிட முடியாது..” என்ற இறுமாப்போடு சொல்லிக் கொள்ளுமளவுக்கு சக்திவாய்ந்த இயக்கமாக இன்றைய திராவிட இயக்கம் இருக்கிறதா என்பதே கேள்விக்குறியாக உள்ள நிலையில்; அரசியலை சினிமா வழியே மற்றும் கற்றுக்கொள்ளும் அறிவார்ந்த தமிழ் சமூகத்திடம் சர்க்கார் போன்ற திரைப்படங்கள் ஏற்படுத்தும் விளைவுகள், திராவிட இயக்கத்தை வலுவிழக்கச் செய்த திராவிட கழகங்களுக்கு ஒரு எச்சரிக்கை மணி என்றே எண்ணத் தோன்றுகிறது. திராவிட இயக்கம், தந்தையின் தோளிலிலேயே பயணிக்கும் சவலைப்பிள்ளைகளைப் போல பெரியார் பார்ப்பனருக்கு எதிரி;ஆதலால் இந்து மதத்திற்கும் எதிரி என்பதைத்தாண்டி வளரவில்லை அல்லது வளரவிரும்பவில்லை அல்லது வளரவிடப்படவில்லை என்றிருக்கும்போது, RSS போன்ற இயக்கங்களின் sustainability ஆச்சரியமளிக்கிறது.

IMG_20181020_2024062

இயக்கமற்ற ஒரு அரசியல் கனவை இங்கு நடக்கும் அரசியல் ஏமாற்றங்களுக்கு தீர்வாக முன்வைக்கிறது சர்க்கார். அண்ணா ,கலைஞர், எம்ஜிஆர் மற்றும் ஜெயலலிதா போன்ற ஆளுமைகள் ஒரு இயக்கத்தின் சிந்தனை மரபிலிருந்தே உருவாகி வரமுடியும். இயக்கமற்ற அரசியல் நல்லவர்களை வேண்டுமானால் அடையாளம் காண உதவலாம், ஆனால் நாட்டை ஆள்வதற்கு இயக்கங்கள் உருவாக்கும் வல்லவர்களே தேவை என்பதே நிதர்சனமான உண்மை. இந்த வல்லவர்களால் ஒட்டுமொத்த தமிழகமும் தேங்கிப் போய்விட்டது என்பதற்கு உதாரணமாக சமகாலத்தில் நடைபெற்ற சில துரதிர்ஷ்டவசமான சம்பவங்களைச் சுட்டிக்காட்டி, “போதும் தி.மு.க; போதும் அ.தி.மு.க” என்ற ஸ்லோகத்தை இளையவர்களின் மனதில் பதியவைக்கும் முதல் முயற்சி போன்றே உள்ளது சர்க்கார். இனி வரும் படங்களிலும் இம்முயற்சி தொடரலாம்.

images (69)

விஜய் இல்லாத ஒருசில அபூர்வகாட்சிகளில் கூட விஜயைச் சுற்றியே நகரும் திரைக்கதை; வழுவான வில்லன்களாக இருந்திருக்க வேண்டிய பழ.கருப்பையாவையும், ராதாரவியையும் தெருச்சண்டையை கட்டப்பஞ்சாயத்து செய்து வைக்கும் மூன்றாம்தர ரவுடிகளைப்போல சித்தரித்திருப்பது; கீர்த்தி சுரேஷும், யோகிபாபுவும் வீணடிக்கப்பட்டிருப்பது என சிலவற்றை ஒதுக்கிவிட்டால், சர்க்கார் ஏற்படுத்த விரும்பிய சிறுபிள்ளைத்தனமான மாற்றங்களை அருமையான திரைக்கதை மற்றும் கூர்மையான வசனங்கள் மூலம் சொல்லியிருக்கும் வகையில் இது ஒரு கவனிக்கப்பட வேண்டிய படமே.

images (68)
‘முதல்வன்’ புகழேந்தி, ‘சிவாஜி’ சிவாஜி வரிசையில் ‘சர்க்கார்’ சுந்தர ராமசாமியும் அரசியல்வாதிகளின் முட்டாள்தனத்தால் பெரும் தலைவராக உருவெடுக்கிறார். தானிழந்த ஓட்டை மீட்டெடுக்கும் முயற்சியில், அரசியல் தலைவர்கள் உருவாக்கி வைத்திருக்கும் பிம்பத்தை நொறுக்கி ஒட்டுமொத்த தமிழகத்தின் மீட்பராகிறார் விஜய். அதற்காக, போகிறபோக்கில் அமர்த்தியா சென் போன்ற பொருளாதார மேதைகளால் போற்றப்படும் தமிழகத்தின் சமூகநலத் திட்டங்களை கொச்சைப்படுத்தியிருப்பது போன்ற அசட்டுத்தனமான மேட்டிமைவாதங்களைத் தவிர்த்திருக்கலாம்.

சர்க்காருக்கு ‘49 P’ என்றே பெயரிட்டிருக்கலாம் என்றெண்ணுமளவுக்கு இந்த விதியை பிரபலப்படுத்தியுள்ளது சர்க்கார். ஒவ்வொருவரின் ஓட்டும் களவாடப்படுவதை மிகச் சாதாரணமாக கடந்து செல்லும் அன்றாடங்களில் சிக்கிக் கொண்ட மனிதர்களை, சேற்றிலிருந்து சிலுப்பிக்கொண்டெழும் பன்றிகளென எழவைக்கும் மிகச்சீரிய முயற்சி என்றவகையில் ‘சர்க்கார்’ பாராட்டப்பட வேண்டிய படமும் கூட.

images (70)

96 – தவிப்பும் ஈர்ப்பும்

images (63)5647032006474962030..jpg
பரந்த புல்வெளியில் ‘96’ என்ற நம்பர் ஜொலிக்க நடக்கும், 22 ஆண்டுகளுக்குப் பிறகான re-unionல் திரிஷாவும், விஜய் சேதுபதியும் தாங்கள் விட்டுச் சென்ற காதல் தங்களுக்குள் இன்னும் எப்படி உறைந்திருக்கிறது என்று கண்டுகொள்ள முயற்சிக்கிறார்கள். இங்கு ஆரம்பிக்கும் ஜானுவின் தவிப்பும், ராமின் மாறாத அந்த ஈர்ப்பும் படம் முழுக்க கவிதையாய் சித்தரிக்கப்பட்டிருக்கிறது.

images (65)510869013397835119..jpg

அந்த மென்மையான புல்வெளியைவிட மென்மையானவராக இருக்கிறார் ராம். மின்சார கனவில் வரும் பிரபுதேவா, கஜோல் மீதான தன் ஈர்ப்புக்கு காரணம் புரியாமல், “நீங்க…எப்படின்னாம்மா..பார்த்தா..கும்புடுற டைப்…” என்பார். “So, உங்க ஆராய்ச்சியோட முடிவு, நான் ஒரு தேவதை..” என்பார் கஜோல்.
ஜானுவைப் பார்த்தவுடனேயே ஏற்படும் துடிப்பைக்கூட வெளிக்காட்ட முடியாமல் மிரட்சியோடு சாிந்து விழும் ராம், ஜானுவின் மென்பாதங்கள் பட்டுச் சரியும் அங்குள்ள புல்வெளிப் பரப்பையும், பிரபுதேவாவையும் தான் ஞாபகப்படுத்துகிறார்.

images (66)8517827349986157751..jpg

15 வயதில் தொடங்கிய அந்த ஈர்ப்பை 22 வருடங்களாக எப்படி தக்க வைத்துக் கொள்ள முடிகிறது. இது இலட்சிய காதலில் மட்டுமே சாத்தியம்; அல்லது காதலியை தேவதை ஸ்தானத்தில் உயர்த்தி வைத்திருக்க வேண்டும். ஆனால், சாத்தியமற்ற இந்த ஒன்றை சாத்தியப்படுத்தியிருக்கிறது, விஜய் சேதுபதியின் நடிப்புத்திறன். ராமின் மிகையுணர்ச்சிகளை எந்த மிகையுணர்வுமின்றி நமக்குக் கடத்தும் எதார்த்தமான அவருடைய உடல் மொழி அபாரம். Re-unionல் திரிஷாவுக்கான உணவை எடுத்து தருவதாகட்டும்; அவர் சாப்பிட்ட ஸ்பூனிலேயே அத்தட்டில் மீதமிருந்த உணவை உண்பதாகட்டும்; பள்ளிக்காலத்திலிருந்து தான் விரும்பி கேட்ட “யமுனைஆற்றிலே…” பாடலை ஜானு முதன் முறையாக பாடும்போது பதறி, மின்சாரம் போயிருந்த தன்னுடைய நவநாகரீக அபார்ட்மெண்டில் உள்ள பொருட்களை சிதறடிப்பதாக இருக்கட்டும், வசனங்கள் எதுவுமில்லாமலே எனக்கான தேவதை ஜானு மட்டுமே என்றுணர்த்தி விடுகிறார். குணாக்குகையில் சிக்கிக் கொண்ட குணாவும் அபிராமியும் நினைவுக்கு வந்து போனார்கள்.

images (64)5520288713834274818..jpg

ஆனால், ஜானுக்கள் தேடும் இதுபோன்ற ராம்கள் அருகிவிட்ட காலமிது. கூடியவிரைவில் ராம் போன்றவர்களை மியூசியத்தில் மட்டுமே தேடமுடியும்போல் தெரிகிறது. தன்னைத் தொடக்கூட அனுமதிக்க விரும்பாத ராமைப் பார்த்து மெய்சிலிர்த்துப் போகிறார் ஜானு. ராம் சொன்னதைப் போல, அவன் 22 வருடங்களுக்கு முன்பு தான் விட்டுச் சென்ற இடத்திலேயேதான் நின்று கொண்டிருக்கிறான் என்பதையுணர்ந்ததும், ஜானுவின் தவிப்பு பன்மடங்கு பெருகிப் போகிறது. ராமைத் தவறவிட்ட குற்றவுணர்ச்சியும், வாழ்க்கைப் பயணத்தில் நெடுந்தூரம் கடந்து ராமின் நிலைக்காக வருந்துவதைத் தவிர வேறெதுவும் செய்ய முடியாத இயலாமையும் சேர்ந்து ஜானுவாக வெடித்துச் சிதறி, உருகி, கரைந்து, அழுது, சிரித்து, சீண்டி, மிரட்டி என அநாசயமாக விஜய் சேதுபதியை மிஞ்சி விடுகிறார் இந்த நவீன ஜெர்சி.

trisha-in-96-movie-41781354128792197760.jpg

“என் கணவர் மற்றும் குழந்தையோட சந்தோஷமா இருக்கேன்னு சொல்ல முடியாது. ஆனால் நிம்மதியா இருக்கேன்…” என்ற ஜானுவின் வார்த்தைகள் நாற்பதை தொட்டுக் கொண்டிருக்கும் பெண்களுக்கு திடீரென தேவைப்படும் தாய்மடி கதகதப்பைத்தான் நினைவு படுத்துகிறது. அது ராமிடம் இப்போதும் கிடைக்கும் என்றுணரும்போது உடைந்து போகிறார் ஜானு. ஆனால் ராம் கூடவே இருந்திருந்தால் இது சாத்தியப்பட்டிருக்குமா எனபதையும் இன்றைய ஜானுக்கள் தங்களுக்குள் கேட்டுக்கொள்ள வேண்டும். இந்த கதகதப்பிற்காகவே ஜானுவும், ராமும் நடந்தே அந்த இரவை கழிக்க விரும்பியது ஒளிப்பதிவாளரின் ரசனைக்கு செம தீனி. சென்னையின் சாலைகள் இரவு நேரத்தில் எவ்வளவு விசாலமானவை என்பதை ரம்மியமாக படம்பிடித்துக் காட்டியிருக்கிறார். அதிலும் குறிப்பாக சென்னையின் புதிய அடையாளமான மெட்ரோ ரயில்களும் அதன் நிலையங்களும் கண்ணைக் கவர்கின்றன. இதைவிடப் படத்திற்கு வலுசேர்த்தது சின்ன வயது ராமாகவும் ஜானுவுமாக நடித்தவர்கள்தான். சிறியவர்கள் பெரியவர்களாக நடித்தார்களா அல்லது உண்மையிலேயே அவர்கள் பெரிய நடிகர்கள்தானா என எண்ணுமளவுக்கு பிசிரற்ற நடிப்பு.

kushboo-sundarc-91018m16587057362278498732.jpg

போலிச் சிறகுகளைக் கட்டிக்கொண்டு இரவு முழுதும் நடந்துகொண்டே பறக்கிறார்கள். இறுதியாக விடைபெற்றுக் கொள்ளும்போது மட்டுமே இருவரும் ஒருவரை ஒருவர் தொட்டுக் கொள்கிறார்கள். அதுவும் காரின் கியர்மாற்ற உதவும் லீவரின் மேல் ஜானு தன் கையை வைக்க அதன்மேல் தன்கையை வைத்து கியரை மாற்றிக்கொண்டே அந்த உன்னதக் காதல் விமான நிலையம் நோக்கிப் பயணிக்கிறது. ஒட்டிக்கொண்ட போலிச்சிறகுகளை வெட்ட மனமில்லாமல் வெட்டிக் கொண்டு ஜானு தன் கணவனையும் குழந்தையையும் நோக்கித் தவிப்போடு பயணிக்க, வழக்கம்போல் ராம் தன் தேவதையின் நினைவுகளில் தன்னைப் புதைத்துக் கொள்கிறான், 22 வருடங்களுக்கு முன்பு ஜானுவின் மேலிருந்த அதே ஈர்ப்போடு.

96-trisha-8251288465732373363698.jpg